Leikskólastjóri við Rafstöðvarveg í Elliðarádal

Staða leikskólastjóra í leikskóla við Rafstöðvarveg í Elliðarádal er laus til umsóknar. Leitað er að leikskólakennara með farsæla stjórnunarreynslu og leiðtogahæfileika sem er tilbúinn að leiða metnaðarfullt starf í leikskólanum.

Við bjóðum upp á einstakt tækifæri til að taka þátt í að móta nýjan leikskóla frá grunni.

Við leitum að leiðtoga sem vill byggja upp leikskóla þar sem börnin, náttúran, leikurinn og námið eru í brennidepli og þar sem fagmennska, samstarf og velferð eru grundvöllur starfsins.

Leikskólastjórinn fær tækifæri til að móta menningu, starfshætti og faglega sýn leikskólans í nánu samstarfi við starfsfólk, börn, foreldra og nærsamfélag.

Í leikskólanum verður lögð sérstök áhersla á útinám, umhverfismenntun og tengsl barna við náttúruna. Einstök staðsetning leikskólans í Elliðaárdal skapar fjölbreytt tækifæri til náms og leiks í náttúrulegu umhverfi.

Markmiðið er að skapa námsumhverfi þar sem börn fá tækifæri til að rannsaka, uppgötva og læra í gegnum leik og eigin reynslu. Með útinámi og umhverfismenntun gefst börnum tækifæri til að efla forvitni sína, sköpun, sjálfstæði og virðingu fyrir náttúrunni og umhverfinu. Jafnframt verður lögð áhersla á að börn upplifi sig sem virka þátttakendur í samfélagi sínu og læri að bera ábyrgð á umhverfi sínu.

Starfið byggir á Menntastefnu Reykjavíkurborgar og þeirri sýn að börn öðlist menntun og reynslu sem gerir þeim kleift að hafa jákvæð áhrif á umhverfi sitt og samfélag.

Helstu verkefni og ábyrgð

• Vera faglegur leiðtogi leikskólans og móta framtíðarstefnu hans innan ramma laga, reglugerða, aðalnámskrár og stefnu Reykjavíkurborgar.
• Bera ábyrgð á daglegu starfi í leikskólanum.
• Skipuleggja foreldrasamstarf í samvinnu við foreldra og starfsmenn.
• Hafa yfirumsjón með innra mati á starfi leikskólans og umbótaáætlunum.
• Hvetja til þróunar og nýbreytni í leikskólastarfi.
• Stýra rekstri leikskólans á grundvelli fjárhagsáætlunar, sýnir ábyrgð, ráðdeild og framsýni í nýtingu fjármuna.
• Bera ábyrgð á starfsmannamálum, svo sem ráðningum, vinnutilhögun og starfsþróun.
• Skipuleggja tengsl skólans við ýmsa samstarfsaðila.

Hæfniskröfur

• Leikskólakennaramenntun og leyfisbréf kennara.
• Viðbótarmenntun í stjórnun eða kennslureynsla á leikskólastigi.
• Reynsla af stjórnun.
• Stjórnunarhæfileikar og vilji til að leita nýrra leiða.
• Þekking og reynsla á rekstri, áætlanagerð og fjármálastjórnun.
• Hæfni til að byggja upp jákvæða og faglega starfsmenningu.
• Lipurð og hæfni í samskiptum.
• Sjálfstæði og frumkvæði.
• Áhugi og reynsla af að leiða þróunarstarf.
• Íslenskukunnátta C1 samkvæmt evrópska tungumálarammanum.

Hreint sakavottorð í samræmi við lög og reglur Reykjavíkurborgar.

Nánari upplýsingar

Umsókn fylgi yfirlit yfir nám og fyrri störf, leyfisbréf til að nota starfsheitið kennari og greinargerð um framtíðarsýn umsækjanda á starf í leikskólanum.

Laun eru samkvæmt samningi Sambands íslenskra sveitarfélaga og Kennarasambands Íslands vegna Félags stjórnenda í leikskólum.

Um er að ræða fullt starf og verður ráðið ótímabundið.

Nánari upplýsingar um starfið veitir Hildur Lilja Jónsdóttir, deildarstjóri á leikskólaskrifstofu skóla- og frístundasviðs, í tölvupósti Hildur.Lilja.Jonsdottir@reykjavik.is eða í síma 863-2871.

Vakin er athygli á stefnu Reykjavíkurborgar um jafnan hlut kynja í störfum og að vinnustaðir endurspegli það margbreytilega samfélag sem borgin er.